Ministrja për Europën dhe Punët e Jashtme, Elisa Spiropali, ka reaguar fuqishëm pas deklaratave të ish-kryeministrit Sali Berisha ndaj ambasadorit të Bashkimit Europian në Shqipëri, Silvio Gonzato.

Në një postim në “X”, Spiropali shprehu indinjatën e saj dhe theksoi distancimin e qeverisë shqiptare dhe të ministrisë nga qëndrimet e tilla:
“Tejet e indinjuar nga sulmi i paprecedentë ndaj Ambasadorit të BE-së dhe ndaj vlerave të BE-së në Parlament ditën e sotme. Normalizimi i gjuhës së urrejtjes në diskursin politik dhe shtrembërimi i qëllimshëm i fakteve në lidhje me Ligjin jetik për Barazinë Gjinore është krejtësisht i papranueshëm. Qeveria Shqiptare dhe Ministria për Europën dhe Punët e Jashtme distancohen plotësisht nga retorika dhe qëndrime të tilla,” shkruan Spiropali.

Ajo thekson gjithashtu se Shqipëria qëndron e bashkuar me Europën dhe se ky incident nuk do të dekurajojë reformat për integrimin dhe për avancimin e barazisë gjinore:
“Sot, është rasti të përsërisim edhe një herë me zë të lartë se Shqipëria qëndron e bashkuar me Europën. Ky spektakël i pahijshëm nuk do të na dekurajojë nga reformat jetike të integrimit, as nga angazhimi ynë thelbësor për të ngushtuar në ZERO hendekun e mundësive për gratë dhe vajzat.”