Shkodër – Deputeti i Partisë Demokratike për Shkodrën, Bardh Spahia, ka reaguar ashpër pas ngjarjes së ndodhur mbrëmjen e së dielës, kur punonjës të bashkisë dhe forca policore ndërhynë në hapësirat e Xhamisë “Ebu Beker”, duke hequr një tabelë me thënie profetike.

Në reagimin e tij, Spahia e ka cilësuar këtë akt si “dhunim banditesk ndaj një vendi të shenjtë” dhe si një tregues të mungesës së respektit të pushtetit lokal ndaj besimit fetar dhe traditave të qytetit.

“Pamjet e kësaj ndërhyrjeje janë të turpshme. Policia e shtetit dhe punonjës të bashkisë, me urdhër politik në orët e vona të mbrëmjes, kanë hequr tabelën nga xhamia,” shkruan ai, duke e konsideruar veprimin një shkelje të lirisë shpirtërore dhe traditës historike të Shkodrës.

Spahia ka shtuar se kjo situatë përkujton periudha të errëta të së kaluarës, kur besimi dhe shenjtëria fetare u përballën me dhunë. Ai akuzon drejtuesit lokalë për vendime poshtërues dhe për mungesë respekti ndaj komuniteteve fetare, duke u shprehur:

“Shkodra ka ditur gjithmonë të ruajë ekuilibrin dhe respektin, por ky njeri nuk njeh limite, as histori e traditë.”

Ngjarja ka shkaktuar reagime të shumta në qytet dhe mbetet një çështje e ndjeshme për komunitetin fetar dhe publikun e Shkodrës.