Ngjarja e rëndë që tronditi vendin pranë aeroportit të Rinasit, ku mbeti i vrarë Gilmando Dani, i njohur si krahu i djathtë i Emiljano Shullazit, ka zbuluar një tjetër detaj tronditës: shoqëruesi i tij ishte agjenti i AMP-së (Agjencia e Mbikëqyrjes Policore), Muçi Shaljani — i njohur ndryshe si Muçi Sheqeri — i cili mbeti i plagosur rëndë dhe ndodhet në spital.

Kjo ngre një sërë pyetjesh serioze mbi lidhjen mes një punonjësi të strukturave të kontrollit të policisë dhe një personi të njohur për lidhjet e tij me botën e krimit.

Çfarë e lidhte agjentin e AMP-së me Gilmando Danin?
A ishte ai në një detyrë zyrtare për shkak të funksionit që mbante, apo thjesht ndodhej aty si mik i ngushtë i mikut të Shullazit?

Publiku ka të drejtë të dijë nëse AMP ka dijeni mbi këtë lidhje, mbi arsyet e pranisë së agjentit në makinën e Danit dhe rrethanat që e çuan në atentat.
Në të njëjtën kohë, mbetet e paqartë nëse struktura eprore e tij ishte në dijeni për lëvizjet e Shaljanit atë ditë.

Po ashtu, lindin pyetje të tjera të rëndësishme:
• Si u rekrutua një person me lidhje të tilla në radhët e AMP-së?
• Kush e rekomandoi dhe kush e emëroi në këtë institucion që ka për detyrë të mbikëqyrë integritetin e forcave të rendit?

Publiku pret përgjigje të qarta dhe transparente nga Agjencia e Mbikëqyrjes Policore, e cila ka detyrimin ligjor dhe moral të informojë për gjendjen e punonjësit të saj dhe për çdo rrethanë që lidhet me këtë ngjarje të rëndë që po ngre dyshime të forta mbi integritetin e brendshëm të vetë strukturave të rendit.