Gazetarja e njohur Klodiana Lala ka komentuar atentatin e ndodhur pranë aeroportit të Rinasit, ku mbeti i vrarë Gilmando Dani dhe u plagos rëndë agjenti i AMP-së, Muçi Shaljani (i njohur edhe si Sheqeri).

Në një intervistë televizive, Lala e cilësoi ngjarjen si një krim të mirëorganizuar, të kryer nga autorë profesionistë, duke theksuar se atentati ndodhi vetëm 50 metra larg komisariatit të policisë dhe pranë hyrjes VIP të aeroportit, një nga zonat më të mbrojtura të vendit.

“Autorët nuk ishin amatorë. Ata kryen një krim në një zonë shumë të populluar, ku ndodhet postblloku i policisë, sepse aty kalojnë personazhe të njohur dhe politikanë. Është një zonë që konsiderohet e mbrojtur,” – u shpreh gazetarja.

Ndërkohë, pas atentatit, makina e autorëve, një “Toyota”, u gjet e djegur në fshatin Halil të Krujës, ku gjatë kontrollit u zbuluan katër armë zjarri kallashnikov, të cilat dyshohet se janë përdorur në sulm.

Sipas burimeve hetimore, në ngjarje kanë marrë pjesë të paktën katër persona – dy atentatorët, shoferi i “Toyotës” dhe një tjetër që dyshohet se i ka pritur në Halil me një makinë tjetër, pasi dogjën automjetin e përdorur në atentat.

Po ashtu, mësohet se automjeti në të cilin ndodhej viktima, Gilmando Dani, i përkiste Elvis Kosovës, i njohur në rrethet e tij si “Visi i Garave”.

Hetimet vijojnë, ndërsa ngjarja po trondit opinionin publik për shkak të mënyrës profesionale të ekzekutimit dhe faktit që ndodhi në një zonë të mbikëqyrur nga policia, duke ngritur pyetje serioze mbi sigurinë dhe praninë e grupeve kriminale të armatosura pranë objekteve strategjike të vendit.