Federata Shqiptare e Futbollit ka njoftuar se të gjitha biletat për ndeshjen Shqipëri–Angli janë shitur plotësisht, vetëm pak ditë para përballjes së madhe që do të zhvillohet më 16 nëntor në “Arenën Kombëtare”, në kuadër të kualifikueseve për Botërorin 2026.

Procesi i shitjes u zhvillua përmes një aplikimi elektronik për rezervim, i cili u hap më 15 tetor, ku tifozët patën mundësinë të regjistroheshin dhe më pas përzgjedhja e biletave u bë në mënyrë të rastësishme.

Në njoftimin zyrtar, FSHF falënderon tifozët shqiptarë për mbështetjen e jashtëzakonshme dhe u bën thirrje që të krijojnë një atmosferë të zjarrtë dhe pozitive në stadium.

“Faleminderit të gjithë tifozëve kuqezi që do të jenë në ‘Arenën Kombëtare’ për të përkrahur ekipin tonë kombëtar. Ju ftojmë të krijoni një atmosferë të ngrohtë dhe sportive, ashtu siç di ta bëjë vetëm tifozeria shqiptare”, – thuhet në reagimin e FSHF-së.

Federata ka bërë apel edhe për ata që nuk siguruan bileta, duke i ftuar të mbështesin Kombëtaren me pasion e krenari, kudo që ndodhen.