TIRANË – Pas atentatit të djeshëm pranë aeroportit “Nënë Tereza”, ku u vra krahu i djathtë i Emiljano Shullazit dhe u plagos Muçi Shaljani, agjent i Agjencisë së Mbikëqyrjes Policore (AMP), ky institucion ka nisur menjëherë verifikimin e procedurave të rekrutimit të tij.

Sipas njoftimit zyrtar, Shaljani ishte punësuar në shtator 2025, ndërsa AMP po shqyrton të gjithë praktikën administrative dhe bashkëpunimin me agjencitë përkatëse dhe Policinë e Shtetit për të sqaruar rrethanat e ngjarjes.

Për të garantuar transparencën dhe hetimin e plotë, drejtori i përgjithshëm i AMP-së, Eduart Merkaj, ka urdhëruar pezullimin e zinxhirit komandues të strukturës së Forcës së Posaçme Operacionale deri në përfundimin e verifikimeve.

Në reagimin e saj, Agjencia thekson se rezultatet e hetimeve do të bëhen të ditura në komunikimet e ardhshme, duke nënvizuar rëndësinë e zbardhjes së plotë të ngjarjes dhe procedurave administrative që kanë çuar në punësimin e agjentit të përfshirë.