Detaje të reja kanë dalë në dritë lidhur me atentatin e ndodhur dje në Rinas, ku Glimando Dani, krahu i djathtë i Emiljano Shullazit, u ekzekutua, ndërsa Muçi Sheqeri mbeti i plagosur.
Një dëshmitar i pranishëm në vendngjarje ka treguar:
“Kur po kaloja, dëgjova të shtënat. U tremba dhe pashë kallashin që u përdor. Automjeti u ndal, një person u vra dhe tjetri u plagos. Për mua është si një film, jam i shokuar dhe i tmerruar. Na largoi policia. Ata erdhën shpejt, por në atë moment nuk kishte prezencë policie.”
Ngjarja ndodhi rreth orës 14:00, menjëherë pasi Dani dhe Sheqeri kishin mbërritur nga Barcelona, ku ndodheshin që nga data 7 nëntor. Sipas policisë, autorët i zunë pritë viktimave me një automjet tjetër, duke qëlluar me breshëri plumbash mbi mjetin tip Benz me targa AB 099UO.
Në vendin e atentatit janë gjetur mbi 50 gëzhoja arme kallashnikov, të shkrepura me breshëri nga të paktën 3 armë. Rreth 40 minuta pas ngjarjes, policia lokalizoi të djegur automjetin e autorëve në fshatin Halil, Fushë-Krujë, ku brenda tij u gjetën 4 armë: 3 kallashnikovë dhe 1 pistoletë, që dyshohet të jenë përdorur në ekzekutimin e Danit.
Hetimet për identifikimin dhe kapjen e autorëve janë në zhvillim e sipër nga strukturat e policisë dhe SPAK.
