HAGË – Ish-diplomati amerikan Christopher Hill vijoi të mërkurën për të tretën ditë dëshminë në mbrojtje të ish-presidentit të Kosovës, Hashim Thaçi, në Gjykatën Speciale në Hagë. Hill, i cili ka shërbyer si i dërguar i posaçëm i SHBA-ve gjatë luftës në Kosovë, ka treguar vështirësitë e diplomacisë amerikane për të komunikuar me UÇK-në dhe për të identifikuar udhëheqësit e saj.

“Nuk kishim një pikë kontakti me të cilin mund të komunikonim për të ardhmen,” tha Hill. “Pavarësia e Kosovës ishte më shumë një slogan, dhe të gjithë flisnin për këtë qëllim pa një strukturë të qartë.”

Diplomati shtoi se nuk kishte informacion të besueshëm se kush nxirrte komunikatat e UÇK-së apo kush drejtonte strukturat politike brenda organizatës. Ai theksoi se drejtoria politike ishte një organ i jashtëm që merrej me marrëdhënie ndërkombëtare, ndërsa shtabi i përgjithshëm përbëhej kryesisht nga komandantë lokalë dhe funksiononte si organ ushtarak.

Hill gjithashtu theksoi se gjatë kohës kur ishte i dërguar i SHBA-ve, ata përpiqeshin të identifikonin personat që udhëhiqnin UÇK-në, por nuk kishte një strukturë komanduese të qartë dhe askush nuk fliste zyrtarisht në emër të të tjerëve.

Ky dëshmi vjen në kuadër të gjyqit që po mbahet kundër Hashim Thaçit, Kadri Veselit, Jakup Krasniqit dhe Rexhep Selimit, të cilët akuzohen për krime lufte dhe krime kundër njerëzimit gjatë luftës në Kosovë më 1998–1999. Të katërt i mohojnë akuzat.