Policia e Tiranës ka kërkuar zyrtarisht ndihmën e autoriteteve spanjolle për të zbuluar itinerarin dhe kontaktet e Gilmando Danit dhe Muçi Shaljanit gjatë qëndrimit të tyre 4-ditor në Barcelonë, vetëm pak ditë përpara se të binin pre e atentatit mafioz pranë rrethrrotullimit të aeroportit të Rinasit më 11 nëntor.

Sipas burimeve hetimore, kërkesa drejt Spanjës synon të rindërtojë të gjitha lëvizjet e dy të rinjve – nga hotelimi, kontaktet, takimet, deri te aktivitetet e mundshme të dyshimta – që mund të hedhin dritë mbi motivet dhe autorët e atentatit.

Asnjë përgjigje ende nga Spanja

Deri më tani, autoritetet spanjolle nuk i kanë kthyer një përgjigje zyrtare palës shqiptare, duke e lënë të pezulluar një nga hallkat kryesore të hetimit. Për hetuesit, informacioni nga Barcelona mund të jetë vendimtar për të kuptuar nëse atentati është planifikuar jashtë vendit apo në Shqipëri.

Ndërkohë, policia shqiptare po vijon të analizojë të gjitha provat e mbledhura në vendngjarje dhe po verifikon pistat e lidhura me konfliktet kriminale të dy viktimave.