Autoritetet rumune kanë vënë në pranga një ish-senator, i dyshuar se ka tentuar t’i ofrojë 1 milion euro ryshfet ministrit të Mbrojtjes për të lehtësuar një marrëveshje të ndërlikuar armatimi që synonte të përfitonte fonde nga një program i Bashkimit Evropian.

Sipas hetimeve, skema synonte blerjen e predhave të prodhimit rus në Kazakistan, importimin e tyre në Rumani, ribrendimin si municion rumun dhe më pas shitjen e tyre në Ukrainë përmes një ndërmjetësi bullgar. Qëllimi ishte që operacioni të maskohej si prodhim brenda BE-së, për të përfituar fonde nga programi për Riarmatosjen e Evropës, i nisur në mars për të rritur kapacitetet ushtarake të bllokut.

Dy figura kyçe zbulojnë detaje të skemës

Shërbimi rumun i Radios Evropa e Lirë ka intervistuar dy persona të përfshirë drejtpërdrejt në rast.
Njëri prej tyre deklaroi se ishte kontaktuar nga ish-senatori Marius Ovidiu Isaila, ndërsa tjetri u kontaktua nga biznesmeni bullgar Roman Ivanov Angelov.

Në fillim të tetorit, Angelov dyshohet se ka udhëhequr një delegacion që ka kontaktuar kreun e Romtehnica, kompaninë shtetërore të tregtisë së armëve të Ministrisë së Mbrojtjes së Rumanisë, duke kërkuar ndërmjetësim me kontaktet në Kazakistan.

Shefi i Romtehnica e quan ofertën “të dyshimtë”

“Ata më propozuan një marrëveshje. Ne do të merrnim municion nga Kazakistani dhe do t’ua rishisnim atyre”, – tha drejtori i Romtehnica, Razvan Mincu, për Radion Evropa e Lirë.

Por Mincu shtoi se oferta i ishte dukur e dyshimtë dhe e kishte refuzuar menjëherë.

Tentativa për të korruptuar ministrin e Mbrojtjes

Sipas raportit të prokurorëve, Isaila më pas i është afruar një ndërmjetësi për të tentuar korruptimin e ministrit të Mbrojtjes, Ionut Mosteanu, me qëllim lehtësimin e marrëveshjes së armatimit.

Hetimet për skemën ndërkufitare të trafikimit të armëve dhe abuzimit me fondet e BE-së po vijojnë, ndërsa autoritetet ende nuk kanë bërë publike detaje të tjera mbi përfshirjen e mundshme të aktorëve të tjerë.