Një ngjarje e rëndë ka tronditur komunitetin shqiptar në Shtetet e Bashkuara. Burim Havolli, 41 vjeç, me origjinë nga Kosova, ka ndërruar jetë në Brooklyn të New York-ut pasi u sulmua brutalisht ndërsa po përpiqej të ndalonte një hajdut pakosh në ndërtesën ku punonte si superintendenti.

Sipas policisë së New York-ut dhe raportimeve të mediave amerikane, ngjarja ndodhi paraditen e së mërkurës në një pallat në Ocean Avenue, kur autoritetet u njoftuan për një sulm të dhunshëm. Në vendin e ngjarjes, oficerët gjetën Havollin me plagë të rënda në kokë. Ai u dërgua me urgjencë në Spitalin e Qarkut Kings, por fatkeqësisht nuk arriti t’u mbijetonte dëmtimeve.

Banorët e ndërtesës tregojnë se vjedhjet e pakove ishin bërë problem i vazhdueshëm, dhe Havolli shpeshherë kishte ndërhyrë për të mbrojtur banorët. Për komunitetin, ai ishte “punëtor i palodhur dhe njeri i qetë”, shumë i respektuar dhe i përkushtuar ndaj detyrës dhe familjes së tij.

Burim Havolli jetonte në SHBA me gruan dhe tre fëmijët, ndërsa lajmi i humbjes së tij ka lënë të tronditur familjarët dhe fqinjët. Policia njofton se një person i dyshuar është marrë në pyetje, ndërsa hetimet për zbardhjen e plotë të rrethanave të ngjarjes vijojnë.

Familja ka bërë të ditur se trupi i të ndjerit do të kthehet në Kosovë, ku do të përcillet për në banesën e fundit në vendlindje.