Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar për gjykim shtetasin italian M.G., i akuzuar për “Shkelje të rregullave të qarkullimit rrugor” dhe “Largim nga vendi i aksidentit”. Ngjarja e rëndë ndodhi më 8 gusht 2025, rreth orës 20:00, në aksin Fier–Levan, ku automjeti me targa të huaja i drejtuar nga i pandehuri u përplas me një mjet tip “Mercedes-Benz” të drejtuar nga shtetasi E.Sh.

Sipas hetimeve, pas përplasjes, M.G. u largua menjëherë nga vendi i ngjarjes, duke shmangur përgjegjësinë administrative dhe penale. Si pasojë e aksidentit humbi jetën një i mitur, E.Sh., ndërsa tre persona të tjerë, mes tyre një tjetër i mitur, mbetën të plagosur. Prokuroria thekson se shkeljet e rregullave të qarkullimit rrugor nga ana e të pandehurit kanë qenë përcaktuese në ardhjen e pasojave të rënda.

Në njoftimin zyrtar, organi i akuzës shpreh angazhimin për të vënë para drejtësisë çdo person që me veprimet e tij cënon jetën dhe sigurinë e qytetarëve në rrugë, duke theksuar rëndësinë e respektimit të rregullave të qarkullimit rrugor për të parandaluar ngjarje të tilla tragjike.