Një ngjarje e rëndë ka tronditur qytetin Brest në Francë, ku një çift shqiptar është gjetur i pajetë në banesën e tyre. Sipas autoriteteve franceze, 36-vjeçari Andon Janaqi nga Korça ka vrarë bashkëshorten e tij, 30-vjeçaren Anjeza Zeneli, duke përdorur një pushkë gjahu, dhe më pas ka kryer vetëvrasje.

Çifti ishin prindër të dy djemve të mitur, 9 dhe 3 vjeç. Mediat lokale raportojnë se fëmija 3-vjeçar ndodhej në shtëpi në momentin kur u krye krimi makabër, ndërsa djali i madh nuk kishte mbërritur ende në banesë.

Nëna e autorit, Floresha Janaqi, është shprehur e shokuar dhe ka kërkuar ndihmën e autoriteteve shqiptare për të sjellë trupin e të birit në atdhe. Ajo ka treguar se djali vuante prej kohësh nga ankthi dhe se konflikti mes çiftit ishte bërë i shpeshtë.

“Kam nevojë për ndihmë që të sjell trupin e djalit në Shqipëri. Djali im prej kohësh vuante nga ankthi…”, ka deklaruar ajo, duke kërkuar edhe mirëkuptimin e familjes së Anjezës.

Ngjarja ka shkaktuar tronditje të madhe në komunitetin shqiptar në Francë, ndërsa hetimet për dinamikën e plotë të krimit vijojnë. Autoritetet franceze po punojnë për të siguruar mbrojtjen dhe kujdesin e duhur për dy fëmijët e mbetur jetimë.