Instituti i Gjeoshkencave ka njoftuar se dita e hënë, 17 nëntor, do të shoqërohet me reshje shiu mesatare deri lokalisht intensive në qarqet Shkodër, Lezhë dhe Vlorë. Ndërkohë, në Kukës, Dibër, Durrës, Tiranë dhe Gjirokastër parashikohen reshje të dobëta deri mesatare, herë-herë të shoqëruara me shtrëngata. Në pjesën tjetër të vendit priten reshje më të dobëta.
Sipas IGJEUM, sasia më e madhe e reshjeve pritet të bjerë gjatë pasdites së së hënës, duke rritur rrezikun për probleme në qarkullim, përmbytje të shpejta dhe vërshime uji në zonat urbane, veçanërisht në Shkodër, Lezhë dhe Vlorë, ku sistemi i kanalizimeve mund të mos përballojë intensitetin e lartë të reshjeve.
Apeli i UKV për qytetarët e Vlorës
Shoqëria Ujësjellës Kanalizime Vlorë, duke iu referuar paralajmërimit të Qendrës Kombëtare për Parashikimin dhe Monitorimin e Rreziqeve Natyrore, ka bërë të ditur se më 17 dhe 18 nëntor qyteti i Vlorës pritet të përfshihet nga reshje mesatare deri lokalisht intensive.
UKV u bën thirrje qytetarëve:
• të jenë të kujdesshëm dhe vigjilentë,
• të ndjekin njoftimet zyrtare dhe këshillat e autoriteteve,
• të shmangin parkimin e automjeteve në zonat me risk të lartë për përmbytje.
Sipas institucionit, grupet e punës do të jenë në terren në mënyrë të vazhdueshme, duke marrë masa parandaluese dhe ndërhyrë kur të jetë e nevojshme, për të garantuar funksionimin e sistemit të kanalizimeve dhe menaxhimin e situatës.
Autoritetet u kërkojnë banorëve të tregojnë kujdes të shtuar dhe të jenë të përgatitur për çdo zhvillim, ndërsa reshjet pritet të intensifikohen gjatë dy ditëve në vijim.
