– Një 48-vjeçare, Gentiana Nano, u gjet e pajetë në banesën e saj në lagjen 15 të qytetit të Korçës, pas disa ditësh që kishte shfaqur probleme serioze në frymëmarrje dhe rrahje të shpeshta të zemrës.

Viktima ishte dërguar në urgjencën e spitalit të Korçës dy ditë më parë, ku u trajtua dhe më pas u lirua për t’u kthyer në shtëpi. Familjarët tregojnë se gjendja e saj nuk përmirësohej dhe edhe pas ndërhyrjeve të mjekëve në ditën e dytë, 48-vjeçarja vazhdoi të ndjehej keq. Mëngjesin e sotëm, ajo u gjet e pajetë nga djali dhe babai i saj.

Djali i viktimës, Erdiol Nano, ka hedhur akuza ndaj personelit mjekësor, duke deklaruar se nuk është treguar kujdesi i duhur dhe se mjekët e kanë lejuar të largohej nga spitali në gjendje të rënduar shëndetësore. “Si mund të lejoni një njeri të largohet kur ai thotë që nuk ndihet mirë?” tha ai.

Policia e Korçës po merr deklarimet e familjarëve dhe pritet të marrë në pyetje stafin mjekësor të shërbimit urgjent për të sqaruar rrethanat e ngjarjes. Ndërkohë, trupi i Gentiana Nanos do t’i nënshtrohet autopsisë për të përcaktuar shkakun e vdekjes.