Autoritetet turke kanë arrestuar 11 persona në lidhje me ngjarjen e rëndë që çoi në vdekjen e një gruaje gjermano-turke dhe dy fëmijëve të saj në Stamboll. Familja, e cila jetonte në Gjermani, kishte ardhur në Turqi për pushime, por udhëtimi u kthye në tragjedi pas një helmimi fatal.

Sipas mediave turke, gruaja e identifikuar si Cigden Bocek humbi jetën të premten në spital, një ditë pasi dy fëmijët e saj – djali 6-vjeçar dhe vajza 3-vjeçare – ndërruan jetë si pasojë e helmimit. Babai i familjes vazhdon të qëndrojë nën kujdes intensiv, në gjendje kritike.

Familja u helmua të mërkurën e kaluar pasi konsumoi ushqime tradicionale në lagjen Ortaköy, pranë Bosforit. Hetimet paraprake dyshojnë se helmimi lidhet me ushqimin e servirur, ndërsa zyrtarët e prokurorisë së Stambollit kanë bërë të ditur se në hotelin ku qëndronte familja janë gjetur pesticide.

Lista e të arrestuarve përfshin pesë shitës ushqimi, pronarin e hotelit, dy punonjës të hotelit dhe tre punonjës të një kompanie të kontrollit të dëmtuesve, të cilët dyshohet se mund të kenë lidhje me përdorimin e substancave toksike.

Hetimet vazhdojnë për të përcaktuar përgjegjësinë dhe për të zbardhur plotësisht mënyrën se si substancat helmuese përfunduan në kontakt me ushqimin. Ngjarja ka shkaktuar reagim të gjerë në Turqi dhe Gjermani, duke ngritur shqetësime serioze mbi standardet e sigurisë ushqimore dhe përdorimin e kimikateve në ambientet turistike.