Mjeku kardiolog Kristo Papa, i cili jeton dhe punon prej disa vitesh në Londër, u bë fillimisht pjesë e “Akademisë Politike të PS” me synimin për të kandiduar për deputet nga diaspora në zgjedhjet parlamentare të 11 majit. Megjithatë, ai nuk u përfshi në listën finale të kandidatëve të PS.

Ky zhvillim nuk e ndaloi Papën që të vazhdonte rrugën në politikë. Ai tani ka zgjedhur një rrugë të re, duke iu bashkuar partisë së ekstremit të djathtë britanik, Reform UK, të udhëhequr nga Nigel Farage, e njohur për retorikën e saj të ashpër anti-emigrantë.

Dr. Papa kandidon për këshilltar bashkiak në zonën High Barnet në veri të Londrës. Posteri zyrtar i partisë e prezanton atë me fjalët: “Votoni Reform UK, ne mund ta ndryshojmë Barnet”. Sipas deklaratës së degës lokale të Reform UK, Papa do të shërbejë si Anëtar i Kabinetit për Shëndetësi & Shërbime Sociale për të Rritur, duke sjellë përvojën e tij të gjerë mjekësore dhe lidershipin në përmirësimin e shërbimeve sociale dhe kujdesit ndaj pacientëve.

Partia thekson se vota për Reform UK nën drejtimin e Papës është një votë për “ekspertizë të vërtetë, ndryshim të vërtetë dhe lidership të vërtetë”, me synimin për të rivendosur një sistem të sigurt, efikas dhe të dhembshur për banorët e Barnet.