Një emigrant shqiptar, që jetonte ilegalisht në Mbretërinë e Bashkuar, është dënuar me pesë vjet burg nga Gjykata e Lartë e Glasgow, për rolin e tij në një grup të organizuar kriminal që kultivonte kanabis në disa rajone të Skocisë.

Afrim Krasniqi, 29 vjeç, u rekrutua nga banda për shkak të njohjes së mirë të gjuhës angleze. Ai shërbente si ndërmjetës për të mashtruar pronarët e shtëpive duke u paraqitur si shtetas italian, çka u hapte rrugë kultivimeve të kanabisit në pronat e tyre.

Sipas hetimeve, grupi synonte të përdorte prona në Renfrewshire, Edinburgh, Penicuik, Aberdeen, Ayrshire dhe Angus, me një vlerë të mundshme tregu të drogës që arrinte deri në 4 milionë paund.

Krasniqi pranoi fajësinë për përfshirje në furnizimin me drogë të klasit B gjatë periudhës mars 2021 – shtator 2023. Pranimi i fajit bëri të mundur uljen e dënimit nga gjashtë në pesë vjet.

Avokati i tij mbrojtës pretendoi se roli i klientit ishte “kryesisht përkthyes” dhe se ai nuk merrej drejtpërdrejt me kultivimin. Por prokuroria tha se ndërhyrja e tij ishte thelbësore për funksionimin e skemës kriminale.

Gjykatësi Lord Arthurson deklaroi se Krasniqi ishte pjesë e një “ndërmarrjeje kriminale në shkallë të gjerë dhe të planifikuar me kujdes”, duke theksuar se angazhimi i tij ndihmoi në ngritjen e fermave të kanabisit dhe manipulimin e matësave të energjisë elektrike në pronat e përdorura nga banda.