Një ngjarje e rëndë është regjistruar sot në Durrës, ku një 14-vjeçar ka plagosur me thikë një bashkëmoshatar, pas një konflikti që nisi për një koment në rrjetin social TikTok.

I mituri me iniciale M.K. ka dhënë dëshminë e tij para grupit hetimor dhe psikologes, duke treguar se gjithçka filloi nga një debat online dhe degjeneroi kur dy adoleshentët u takuan fizikisht, secili i shoqëruar nga një grup shokësh.

Në dëshminë e tij, 14-vjeçari tregon:
“Pak ditë më parë ngecëm për një koment në TikTok. Aty nisi. U grindëm me komente. Më pas lamë të takoheshim, nga ana jonë për t’u sqaruar, por e dinim që ata do vinin me disa shokë. Edhe ne u bëmë një grup.”

Ai shpjegoi se takimi u vendos pranë banesës së bashkëmoshatarit tjetër. Sipas tij, të dy grupet kishin shkuar të përgatitur për një konflikt të mundshëm.

“U nisëm të debatonim, kush je ti kush jam unë. U përfshimë në një sherr masiv. Ata na qëlluan me mjete të forta. Unë nxora thikën… më shumë për t’i trembur. Për vetëmbrojtje qëllova, se ishte më i madh dhe po më godiste.”

14-vjeçari deklaroi se e goditi disa herë bashkëmoshatarin, por sipas tij, pa synimin për ta vrarë apo plagosur rëndë:
“Jam penduar shumë. Nuk doja të shkonte kështu.”

I plagosuri ndodhet nën kujdes mjekësor, ndërsa policia po vijon hetimet për zbardhjen e plotë të rrethanave të ngjarjes dhe identifikimin e të gjithë të përfshirëve.