Zyrtarë amerikanë po shqyrtojnë mundësinë që udhëheqësi socialist i Venezuelës, Nicolas Maduro, të kalojë vitet e fundit të jetës në luks jashtë vendit, ndërkohë që fushata e Presidentit Trump kundër gomoneve të dyshuara për trafik droge po afron operacionet pranë brigjeve të Amerikës së Jugut.

Sipas një burimi të lartë të administratës Trump, Sekretari i Shtetit, Marco Rubio, ka propozuar që Maduro, 63 vjeç, të transferohet në Katar, një nga vendet më të pasura me gaz, që po ndërmjetëson konfliktin. Tre zyrtarë aktualë dhe dy ish-zyrtarë e përshkruajnë skenarin si të mundshëm.

“Katari, Arabia Saudite dhe Emiratet e Bashkuara ndihmojnë të bëhen gjëra të tilla. Kjo i ndihmon të ndërtojnë kredenciale me SHBA-në,” tha një burim pranë administratës.

Megjithatë, një palë e njohur me rolin e Katarit në bisedimet për Venezuelën këmbënguli se Maduro nuk po kërkon të strehohet në Doha, ku familja mbretërore më herët ka ndihmuar në ndërmjetësimin e planeve të paqes. Katar ka strehuar edhe drejtues të Hamasit, gjë që më pas çoi në sulme ajrore të Izraelit në shtator.

Presidenti Trump ka kërkuar javën e kaluar që Maduro të dorëhiqet menjëherë, ndërsa ky i fundit dyshohet se ka ofruar dorëzimin e pushtetit tek zëvendëspresidentja dhe një amnisti të gjerë për veten dhe aleatët.

Muajin e kaluar, administrata Trump shpalli Maduro-n dhe aleatët e tij si pjesë të një organizate të huaj terroriste, duke i dhënë SHBA-së më shumë opsione për veprime ushtarake brenda Venezuelës. Rubio akuzoi ‘Kartelin e Diellit’, të udhëhequr sipas tij nga Maduro, për dhunë terroriste.