Gjykata e Apelit Tiranë ka vendosur të zbusë masën e sigurisë për Banush Koxhaj, punonjës sigurie në Gjykatën e Apelit, nga “arrest në burg” në “arrest në shtëpi”. Vendimi vjen pas shqyrtimit të gjendjes së tij të rënduar shëndetësore, pasi Koxhaj vuan nga diabeti prej disa kohësh.

Koxhaj u arrestua menjëherë pas ngjarjes së rëndë, kur gjyqtari Astrit Kalaja u ekzekutua në sallën e gjyqit nga Elvis Shkambi dhe Gjon Shkambi. Ai akuzohet për “shpërdorim detyre”, pasi nuk kishte ushtruar kontroll fizik ndaj dy të dyshuarve të armatosur që hynë në sallën e gjyqit, edhe pse detektori i skanerit kishte sinjalizuar praninë e armëve.

Ekspertiza mjeko-ligjore ka treguar se një plumb i vetëm plagosi babë e bir, Ragip dhe Elvis Kurtaj, të cilët ishin të pranishëm gjatë ngjarjes. Ndërkohë, Elvis dhe Gjon Shkambi mbeten në burg për akuzat e “vrasjes në rrethana cilësuese ndaj gjyqtarit” dhe “mbajtjes pa lejë të armëve dhe municioneve”.

Vendimi për zbutjen e masës ndaj Koxhajt ka ngjallur debate në opinionin publik, duke reflektuar tensionin rreth ngjarjes së paprecedentë në Gjykatën e Apelit Tiranë.