Protestat e fermerëve në Greqi janë përshkallëzuar ndjeshëm, duke përfshirë tashmë edhe ishullin e Kretës. Sot, aeroporti “Nikos Kazantzakis” në Heraklion është bllokuar plotësisht, pasi fermerë të shumtë kanë arritur me traktorë dhe mjete të tjera, duke marrë pjesë në protestën e përgjithshme të bujqve dhe blegtorëve.

Tensionet nuk munguan as në Hania, ku përplasje të ashpra mes protestuesve dhe policisë sollën përmbysjen e një automjeti policor dhe dëmtime të tjera të furgonëve të rendit, goditur me gurë nga protestuesit.

Në rrugën Senetaki të Heraklionit, policia ngriti një barrikadë, ndërsa fermerët dhe blegtorët paralajmëruan se do të arrijnë në aeroport “me çdo kusht” për ta bllokuar. Përpjekjet e tyre për të çarë kordonin e policisë çuan në përdorimin e gazit lotsjellës nga efektivët, duke shkaktuar incidente dhe pengesa të mëtejshme.

Mjetet bujqësore janë parkuar përgjatë autostradës, duke bërë që aksesi nga Heraklioni drejt aeroportit të jetë praktikisht i pamundur, ndërsa situata mbetet tensionuar dhe e paparashikueshme.