Presidenti i Shteteve të Bashkuara, Donald Trump, deklaroi të premten se ndihet “disi i zhgënjyer” nga homologu ukrainas, Volodymyr Zelensky, pasi ky i fundit ende nuk ka lexuar propozimin për planin e paqes mes Ukrainës dhe Rusisë.

Komentet Trump i bëri gjatë tapetit të kuq në Kennedy Center Honors, ku u pyet nga gazetarët për zhvillimet më të fundit të negociatave. “Po flasim me Putinin dhe me udhëheqësit ukrainas, përfshirë Zelensky-n. Duhet të them se jam pak i zhgënjyer që ai nuk e ka lexuar ende propozimin,” tha Trump, duke shtuar se “besoj se Rusia është dakord. Nuk jam i sigurt për Zelensky-n, megjithëse njerëzve të tij u pëlqen.”

Nga ana tjetër, Zelensky bëri të ditur në një postim se kishte folur me Stephen Witkoff dhe Jared Kushner mbi ecurinë e bisedimeve. “Përfaqësuesit amerikanë e njohin mirë pozicionin bazë të Ukrainës. Ishte një bisedë konstruktive, edhe pse jo e lehtë. Ne po vazhdojmë punën,” deklaroi presidenti ukrainas.