Një ngjarje e rëndë ka tronditur zonën e Klosit mbrëmjen e djeshme, rreth orës 23:40, në urën e fshatit Fshat, përgjatë Rrugës së Arbrit. Sipas të dhënave paraprake, një 39-vjeçar, i identifikuar me inicialet K.K., nip i Nehat Kullës, dyshohet se është vetëhedhur nga ura më e lartë në Ballkan, e cila arrin rreth 158 metra lartësi.

Mësohet se ai ka ndaluar automjetin në mes të urës, është ngjitur mbi mbrojtëset anësore dhe më pas është hedhur në greminë.

Për shkak të terrenit tepër të vështirë, shërbimet e Policisë dhe zjarrfikësve kanë vijuar kërkimet për disa orë, derisa trupi i pajetë u gjet dhe u nxor rreth orëve të para të mëngjesit.

Njoftimi zyrtar i Policisë:
“Më datë 08.12.2025, rreth orës 23:40, tek ura e fshatit Fshat, bashkia Klos, shtetasi K.K., rreth 39 vjeç, dyshohet se është vetëhedhur nga ura dhe për pasojë ka humbur jetën. Si pasojë e terrenit të vështirë, pas disa orësh kërkimi nga shërbimet e Policisë dhe të Zjarrfikësve, u bë e mundur gjetja dhe nxjerrja e trupit nga gremina. Grupi hetimor, nën drejtimin e Prokurorisë, po punon për zbardhjen e rrethanave.”

Hetimet vijojnë për të përcaktuar motivet që çuan në këtë akt tragjik.