Presidenti amerikan Donald Trump lëshoi deklarata të forta ndaj Evropës ditën e hënë, vetëm pak ditë pas publikimit të “strategjisë së re të sigurisë kombëtare” nga administrata e tij—një dokument me tone të hapura nacionaliste, që sulmon politikat e Bashkimit Evropian, veçanërisht ato të migracionit.

“Evropa duhet të jetë shumë e kujdesshme,” tha Trump para gazetarëve në Shtëpinë e Bardhë, gjatë një eventi në mbështetje të fermerëve amerikanë të prekur nga tarifat. “Evropa po shkon në disa drejtime të këqija — shumë keq, shumë keq për njerëzit. Ne nuk duam që Evropa të ndryshojë kaq shumë,” shtoi presidenti, pa dhënë sqarime të mëtejshme.

Deklaratat e tij erdhën pasi u shmang pyetja për gjobën shumë milionëshe që BE-ja vendosi ndaj platformës X të Elon Musk. Trump e quajti vendimin “të neveritshëm”, duke thënë se do të prononcohej më gjerësisht pas marrjes së informacionit të plotë. Ndërkohë, vetë Musk reagoi duke kërkuar që “BE-ja të shfuqizohej”.

Dokumenti i sigurisë kombëtare, i publikuar të premten nga administrata Trump, parashikon një skenar alarmues për kontinentin: sipas strategjisë, “Evropa po rrezikon fshirjen kulturore” nëse nuk ndërhyn kundër “imigracionit masiv”. Teksti paralajmëron se, “nëse trendet aktuale vazhdojnë, kontinenti do të jetë i panjohur në 20 vjet ose më pak”.

Në vijim, administrata amerikane kritikon me tone të forta BE-në për vendime që, sipas saj, “minojnë lirinë dhe sovranitetin politik”, politikat migratore që “po transformojnë kontinentin dhe po shkaktojnë tensione”, si dhe një sërë çështjesh të tjera që prekin “lirinë e shprehjes”, “rënien e lindjeve” dhe “identitetet kombëtare”.

Që prej rikthimit të Trump në pushtet në janar, marrëdhëniet transatlantike janë tensionuar ndjeshëm. Afrimi i tij me Rusinë dhe mbështetja për partitë konservatore dhe të ekstremit të djathtë në Evropë kanë shtuar edhe më shumë debatet mes Uashingtonit dhe Brukselit.