Një shpërthim me tritol tronditi Shkodrën mbrëmjen e djeshme, rreth orës 22:20, në lagjen “Skënderbeg”, pranë derës së një biznesi reklamash.

Sipas burimeve policore dhe pamjeve të kamerave të sigurisë, dy persona të maskuar, të lëvizur me motoçikletë, u ndalën para objektit, vendosën lëndën plasëse dhe u larguan me shpejtësi vetëm pak sekonda më pas.

Shpërthimi shkaktoi vetëm dëme materiale, pa lëndime në njerëz. Dëmtime të dukshme janë evidentuar në hyrjen e biznesit.

Objekti është në pronësi të Lulzim Mehmetajt, ndërsa deri tani nuk ka informacione për motive të mundshme apo kërcënime të mëparshme.

Policia ka sekuestruar pamjet filmike dhe ka nisur identifikimin e autorëve, ndërsa zona u rrethua për ekspertizën e nevojshme të lëndës plasëse.

Ngjarja konsiderohet një tjetër episod i kriminalitetit me tritol në qytet, ndërsa hetimet vijojnë.