Një ngjarje e rëndë ka tronditur qytetin e Durrësit, ku 15-vjeçari Erion Boba humbi jetën pas një sherri mes adoleshentëve që nisi nga ofendime në rrjetet sociale.

Hetimet tregojnë se viktima dhe autori 14-vjeçar nuk kishin konflikt personal, por u përfshinë në përplasjen mes shokut të Erionit dhe vëllait të të miturit. Konflikti nisi në TikTok, ku komentet dhe ofendimet u përshkallëzuan deri në një takim sqarues pranë ish-Kënetës së Durrësit më 25 nëntor, rreth 20 minuta larg shkollës “Dom Nikollë Kaçorri”, ku mësonin të dy.

Gjatë përleshjes, u përdorën grushte, bishta çadrash, dërrasa dhe mjete të forta. Sipas dëshmive, 14-vjeçari M.K. goditi Erionin katër herë me thikë, duke i shkaktuar plagë fatale në gjoks dhe zemër. Erioni u dërgua me urgjencë në spitalin “Nënë Tereza” në Tiranë, ku luftoi për jetën nëntë ditë, por nuk mbijetoi.

Pas ngjarjes, autori dhe shokët e tij u larguan, duke marrë armën e krimit, e cila më pas u gjet në makinën me të cilën kishin arritur në vendngjarje.

Autoritetet vijojnë hetimet për të sqaruar detajet e ngjarjes dhe për të identifikuar rolin e secilit të mitur të përfshirë.