Këshilli i Lartë i Prokurorisë (KLP) po zhvillon sot mbledhjen vendimtare për zgjedhjen e drejtuesit të ri të Prokurorisë së Posaçme Kundër Korrupsionit dhe Krimit të Organizuar (SPAK), një nga institucionet kyçe të reformës në drejtësi.

Në garë janë katër kandidatë me profile të ndryshme profesionale: Adnand Xholi, Elvin Gogaj, Doloreza Musabelliu dhe Klodian Braho. Ky i fundit është edhe kandidati që po paraqet platformën e tij në momentet e fundit të mbledhjes.

Deklaratat e Brahos: 18 vite eksperiencë dhe miliona euro të konfiskuara

Gjatë prezantimit, Klodian Braho vuri theksin te përvoja e tij e gjatë në sistemin e drejtësisë:

“Kam rreth 18 vite në sistemin e Prokurorisë. Kam ushtruar funksionin e prokurorit në disa zyra të ndryshme të vendit.”

Ai theksoi rolin që ka pasur në Prokurorinë e Vlorës, ku ka qenë pjesë e njësisë Task Forcë, por edhe faktin se është një nga prokurorët themelues të SPAK:

“Prej ditës së parë të funksionimit të Prokurorisë së Posaçme jam pjesë e kësaj strukture.”

Braho nënvizoi disa nga çështjet më të rëndësishme që ka hetuar, duke përfshirë dosje me zyrtarë të lartë dhe grupe kriminale. Ai përmendi edhe arritjen e madhe financiare të vitit të kaluar:

“Në vitin 2023 u konfiskuan 18.4 milionë euro që i përkisnin një organizate kriminale.”

Vizioni për drejtimin e SPAK

Në platformën e tij, Braho tha se synon të forcojë akoma më shumë konsolidimin institucional të SPAK:

“Vizioni im përfshin organizimin dhe konsolidimin e Prokurorisë së Posaçme. Sa i përket ushtrimit e ndjekjes penale do të garantohet zbatimi i ligjit, askush nuk do të jetë mbi ligjin.”

Ai kujtoi se SPAK ka tashmë një kornizë strategjike të miratuar, të cilën synon ta zbatojë me rigorozitet nëse merr drejtimin e institucionit.