Seanca e sotme plenare është tensionuar ndjeshëm pas një debati të ashpër mes deputetit të opozitës Klevis Balliu dhe mazhorancës, lidhur me procedurën e votimit për Avokatin e Popullit.

Duke marrë fjalën në foltore, Balliu akuzoi shumicën qeverisëse se po shkelnin me qëllim nenin 72 të Rregullores së Kuvendit, duke çuar për votim një projekt-vendim nga i cili opozita ishte tërhequr zyrtarisht.

Balliu: “Procesi është i paligjshëm – nismëtari është tërhequr”

Duke iu referuar rregullores, Balliu citoi:

“Nismëtari i projektligjit ose i projekt-vendimit mund ta tërheqë projektin e tij deri në çastin kur ai nuk është votuar në parim.”

Sipas tij, fakti që rendi i ditës përdor termin projekt-vendim, e bërë vetë nga mazhoranca, e bën procesin të pavlefshëm:

“Opozita është tërhequr nga ky projekt-vendim. Neni 72 jua thotë. Pse po e vazhdoni këtë?”

Balliu akuzoi mazhorancën për “kapjen e institucionit të fundit të pavarur” dhe për përpjekje për të imponuar kandidatin e tyre.

“Sillni kë të doni, edhe Suel Çelën! Po e bëni farsë votimin”

Në një moment të fjalimit, deputeti përdori tone ironike dhe të forta, duke përmendur emra të botës së krimit:

“Ju mund të sillni dhe Suel Çelën, bëjeni Avokat të Popullit. O ndonjë Troplin e Xhabaft. Merreni, votojeni, se ata ju dalin zot ju.”

Sipas Balliut, mazhoranca po përdor kartonin e votave pa respektuar as ligjin, as moralin, as procedurën:

“Votat i kemi, do zgjedhim atë që duam ne – thoni të paktën të vërtetën! Mos na shisni moral të rremë.”

“Po shkeli rregulloren mazhoranca, s’ka më vend për debat”

Duke cituar rendin e ditës që e kishte formuluar vetë mazhoranca, Balliu theksoi:

“Projekt-vendim e keni shkruar ju, jo ne. Rregulloren e keni bërë ju, dhe tani nuk po i përmbaheni dot rregullit tuaj.”

Në përmbyllje, ai i kërkoi mazhorancës dy zgjidhje:

Të respektojë ligjin dhe të ndërpresë procesin, ose

Të pranojë hapur se po voton duke shkelur çdo procedurë demokratike.

“Nëse nuk dëgjohet më as ligj, as rregullore, s’ka më vend për diskutime këtu.”

Seanca vijoi mes tensioneve dhe ndërprerjeve, teksa mazhoranca u akuzua sërish se po shtyn përpara një vendimmarrje të kontestuar nga opozita.