Kryeministri Edi Rama ka reaguar pas zgjedhjes së Klodian Brahos si kreu i ri i SPAK, një vendim që u votua me 7 vota pro. Përmes një mesazhi në platformën X, kreu i qeverisë ka përgëzuar Brahon për, siç i cilëson ai, “arritjet e pamohueshme të SPAK” gjatë tre viteve të drejtimit të tij.

Rama theksoi se institucioni i Prokurorisë së Posaçme ka shënuar progres të dukshëm në luftën kundër korrupsionit dhe krimit të organizuar, ndërsa nënvizoi se mbështetja e qeverisë për këtë institucion do të mbetet e plotë dhe e pandryshuar.

“SPAK do të ketë mbështetjen e palëkundur për të përmbushur misionin e vet, në kushte optimale dhe në pavarësi të plotë”, shkruan kryeministri, duke e konsideruar drejtimin e Brahos një garanci për vazhdimësinë e reformës në drejtësi.

Zgjedhja e kreut të ri të SPAK vjen në një moment të rëndësishëm, teksa priten zhvillime të tjera në çështje madhore që po hetohen nga Prokuroria e Posaçme.