Presidenti amerikan Donald Trump nuk dëshiron që situata mes Ukrainës dhe Rusisë të vazhdojë të trajtohet vetëm me bisedime të pafundme, por kërkon hapa konkretë drejt paqes. Kështu deklaroi zëdhënësja e Shtëpisë së Bardhë, Karoline Leavitt, duke zbuluar se kreu i Shtetit është tejet i irrituar nga stagnimi i procesit.

“Ai është i frustruar nga Ukraina dhe Rusia,” u shpreh Leavitt. “Nëse ka një shans real për të nënshkruar një marrëveshje paqeje dhe nëse mendojmë se takimet ia vlejnë, atëherë do të dërgojmë një përfaqësues.”

Zëdhënësja theksoi se Presidenti Trump kërkon rezultate dhe jo takime formale pa përmbajtje.

“Presidenti është i ngopur me takime për hir të takimeve. Ai nuk dëshiron më të flasë, ai dëshiron veprim — jo fjalë,” shtoi Leavitt, duke iu përgjigjur pyetjeve mbi angazhimin e SHBA në bisedimet e mundshme të paqes që mund të zhvillohen fundjavën në Ukrainë.

Sipas Shtëpisë së Bardhë, SHBA do të përfshihet vetëm nëse ekziston një perspektivë reale për përparim diplomatik.