Aktori Bes Kallaku rikthehet në vëmendjen e publikut me një rrëfim të hapur për jetën e tij, duke folur për kapitujt e mbyllur, përfshirë divorcin nga Xhensila Myrtezaj, dhe për qasjen e tij ndaj të tashmes.

I ftuar në një intervistë me Grida Dumën, Kallaku theksoi se nuk e sheh veten si dikë të jashtëzakonshëm, por si një njeri që ka lënë gjurmë pozitive në jetën e të tjerëve. “E shkuara ime është e vdekur. Unë po jetoj të sotmen”, tha ai, duke shtuar se fokusi i tij është te rruga që po ndërton sot, larg ngarkesave emocionale të së kaluarës.

Gjatë bisedës, aktori rrëfeu edhe zhgënjimet nga njerëzit që dikur i kishte pranë dhe sakrificat që ka bërë për të ndihmuar të tjerët. Megjithatë, mesazhi i tij ishte i qartë: “Sado të zgjasë nata, përfundon me lindjen e diellit.”

Kallaku nënvizoi se pasuria më e madhe për të janë fëmijët, prindërit dhe marrëdhëniet e vërteta, duke theksuar se, pavarësisht sfidave dhe zhgënjimeve, jeta duhet të merret për të mirëqenë.

“Zoti është me mua, kush mund të jetë kundër meje?! Pasuria ime më e madhe janë dy fëmijët e mi, nëna dhe babai im. Marrim jetën për të mirëqenë. Sikur s’do na ndodhë kurrë e keqja”, tha aktori.