Presidenti palestinez, Mahmoud Abbas, ka bërë thirrje Italisë të njohë Shtetin e Palestinës, duke theksuar se kjo do të mbështeste zgjidhjen me dy shtete dhe do të konsolidojë themelet e paqes në rajon.

Në një fjalim gjatë konferencës vjetore të Partisë Vëllezërit e Italisë në Romë, Abbas nënvizoi se krijimi i një shteti palestinez të pavarur në kufijtë e vitit 1967, me Kudsin Lindor si kryeqytet, është mënyra e vetme për të garantuar siguri dhe stabilitet të qëndrueshëm.

Ai shtoi se një shtet sovran palestinez “nuk do të ishte një barrë sigurie për askënd, por një burim stabiliteti rajonal dhe një partner i përgjegjshëm në ruajtjen e sigurisë dhe ndërtimin e paqes”.

Abbas theksoi se populli palestinez aspiron të jetojë në atdheun e tij “me liri dhe dinjitet, në një shtet modern që mbështet demokracinë, pluralizmin, barazinë dhe refuzimin e dhunës”. Ai shprehu shpresën se Italia do të vazhdojë të mbështesë këtë rrugë në favor të zgjidhjes me dy shtete.