Një operacion i gjerë i forcave të rendit në Itali ka çuar në arrestimin e 24 personave, mes tyre edhe një 36-vjeçar shqiptar, të dyshuar për trafikim, posedim dhe shpërndarje të lëndëve narkotike. Sipas autoriteteve, 19 prej të arrestuarve janë dërguar në burg, ndërsa 5 të tjerë janë vendosur në arrest shtëpiak me byzylykë elektronikë.

Hetimi nisi pas vëzhgimit të 36-vjeçarit shqiptar, person me precedent penal, i cili nga hetuesit konsiderohet si “kyçi” dhe forca lëvizëse e trafikut të kokainës në zonën e Foggias. Mediat italiane raportojnë se ai vepronte nga një bazë operative në qytet dhe dyshohet se menaxhonte blerjen me shumicë të drogës, të importuar përmes kanaleve të bashkatdhetarëve të vendosur në Italinë Veriore.

Në këtë aktivitet kriminal ishin të përfshirë shtetas italianë, shqiptarë, gjeorgjianë dhe rumunë, të moshës nga 23 deri në 61 vjeç, aktivë jo vetëm në provincën e Foggias, por edhe në zona të tjera si Rieti, Emilia Romagna dhe Molise e Poshtme.

Fitime deri në 200 mijë euro në muaj

Sipas hetimeve, rrjeti kriminal ishte në gjendje të kontrabandonte nga 5 deri në 10 kilogramë kokainë në muaj vetëm në provincën e Foggias. Droga blihej me rreth 22 euro për gram dhe rishitej në treg për 30 deri në 50 euro për gram, në varësi të sasisë. Fitimet mujore të organizatës vlerësohen rreth 200 mijë euro.

Gjatë hetimit u evidentua edhe cilësia shumë e lartë e kokainës. Një sasi prej 2 kilogramësh, që dyshohet se kishte origjinë nga Bolivia, rezultoi 96% e pastër nga analizat laboratorike të karabinierëve.

Depo të fshehta dhe rrjet paralel në veri

Të dyshuarit përdornin depo të ruajtura për magazinimin dhe paketimin e drogës, e cila shpesh shpërndahej “e pastër”, pa u përzier. Gjithashtu, ndjekja e korrierëve çoi në zbulimin e një rrjeti paralel në provincën e Parmës, ku shtatë persona dyshohet se kishin krijuar një aktivitet të pavarur trafikimi me xhiro edhe më të madhe.

Për t’iu shmangur kontrolleve, grupi përdorte metoda të sofistikuara, si fshehja e drogës në automjete me funde të rreme dhe komunikimi përmes kriptofoneve. Edhe transferimi i parave drejt Shqipërisë ishte nën vëzhgim, duke u realizuar përmes shoferëve të autobusëve dhe kamionëve.

Në janar, gjatë një transferimi të tillë, karabinierët sekuestruan 40 mijë euro cash në një zonë pushimi në autostradën SS16. Paralelisht me arrestimet, janë lëshuar edhe nëntë urdhra për seancë paraprake dëgjimore ndaj personave të tjerë nën hetim për të njëjtat vepra penale.