Kualifikimi për herë të parë në fazën play-off të Kampionatit Botëror 2026 shënoi një moment historik për futbollin shqiptar. Shqipëria përfundoi në vendin e dytë në grupin K, ku konkurronte me Anglinë, Serbinë, Letoninë dhe Andorrën, duke siguruar mundësinë për të luftuar për një vend në Botëror.
Në këtë kontekst, Mario Mitaj u nderua me trofeun “Zemra Kuq e Zi”, një vlerësim i drejtpërdrejtë nga tifozët. Ky çmim, i votuar nga të gjithë anëtarët e klubit “Tifozët e Kombëtares”, pasqyron përkushtimin dhe performancën e jashtëzakonshme të lojtarit ndaj fanellës kuqezi.
Trofeun ia dorëzoi Lorik Cana, ish-kapiteni legjendar i Kombëtares, ndërsa Mitaj u shpreh i lumtur dhe krenar për këtë njohje nga tifozët, duke e konsideruar një motiv shtesë për të vazhduar të japë më të mirën për Kombëtaren.
