Kryetari i Partisë Demokratike, Sali Berisha, ka lëshuar akuza të forta ndaj Taulant Ballës, duke deklaruar se ai duhej të ishte dënuar me të paktën 30 vite burg për veprat penale që, sipas tij, ka kryer.
Gjatë një konference për shtyp ditën e djeshme, Berisha tha se Balla është i përfshirë në komunikime të regjistruara me Mario Çelën, vëllain e Suel Çelës, ku sipas tij diskutohet arrestimi i kundërshtarëve të bandës Çela në Elbasan, në këmbim të angazhimit të grupit kriminal në fushata elektorale dhe sigurimit të votave.
“Taulant Toyota Yaris duhej të ishte, për veprat penale që ka kryer, i dënuar me të paktën 30 vite burg. Porositës i vrasjeve, bashkëpunëtor i ngushtë i krimit, ushtar i Suel Çelës”, u shpreh Berisha, duke iu referuar dokumenteve që, sipas tij, janë shkatërruar me procesverbale zyrtare.
Berisha akuzoi gjithashtu Ballën për ndërhyrje në dosjen e njohur si “Toyota Yaris”, duke pretenduar se ai ka kërkuar rikthimin e aseteve të sekuestruara të bandës së Elbasanit për t’i nxjerrë jashtë afateve ligjore.
Sipas kreut të PD-së, të gjitha këto akuza mbështeten në dokumente zyrtare që ai thotë se i ka paraqitur disa herë publikisht. “Taulant Balla është një nga delinkuentët kryesorë në politikën shqiptare sot, pas Edi Ramës dhe Belinda Ballukut”, përfundoi Berisha.
Deri më tani, nuk ka pasur një reagim zyrtar nga Taulant Balla lidhur me deklaratat e Berishës.
