Detaje të reja janë zbardhur lidhur me ngjarjen e rëndë të regjistruar në Qafën e Llogarasë, ku një trup i djegur u gjet brenda një automjeti të parkuar në një zonë të pyllëzuar. Burime zyrtare bëjnë me dije se viktima është identifikuar si Artjon Xhelo, 32 vjeç, ish-efektiv i Policisë së Shtetit.

Sipas policisë, Xhelo ka shërbyer më herët në Forcat Operacionale “Shqiponjat” në Berat, si dhe në Policinë e Poliçanit. Dyshohet se ai vuante nga probleme psikologjike, të cilat kishin ndikuar edhe në karrierën e tij në radhët e policisë.

Trupi i pajetë është gjetur në sediljen e shoferit të mjetit, i cili ishte përfshirë nga flakët. Hetuesit dyshojnë paraprakisht se ish-efektivi mund t’i ketë vënë vetë zjarrin automjetit, duke kryer vetëdjegie, por pista e vrasjes nuk përjashtohet dhe mbetet ende në shqyrtim.

Sipas burimeve, në vitin 2023, për shkak të gjendjes së tij psikologjike, Artjon Xhelo ishte transferuar në Drejtorinë Vendore të Policisë së Poliçanit. Më pas, ndaj tij ishte marrë masë disiplinore dhe ishte përjashtuar nga Policia e Shtetit, pasi kishte humbur armën e shërbimit.

Rrethanat e ngjarjes mbeten ende të paqarta, ndërsa grupi hetimor po vijon punën për zbardhjen e plotë të saj. Trupi i pajetë është dërguar për ekspertizë mjeko-ligjore, e cila pritet të hedhë më shumë dritë mbi shkakun e vdekjes dhe dinamikën e ngjarjes.