Jola Hysaj, e cila nuk arriti të fitojë garën për postin e Avokatit të Popullit, ka reaguar përmes rrjeteve sociale duke falënderuar qytetarët për mbështetjen e tyre.

“Ka momente në jetë që nuk maten me numra, por me kuptimin dhe me vlerën e asaj që përfaqëson. Ky është një prej tyre. Në këtë proces u fol shumë për numra. Procedura kërkonte 28, por 27 mbetet numri im. Dhe për mua, 27 është një numër me fat, sepse përfaqëson mbështetjen reale, respektin dhe besimin e njerëzve që e njohin punën time”, shkruan Hysaj.

Ajo thekson se gjatë këtij rrugëtimi ka përjetuar jo vetëm kritika, por edhe mbështetje të fortë nga familja, miqtë, profesionistët dhe qytetarët. “Kjo mbështetje më ka bërë edhe më të qartë dhe më të motivuar për të vazhduar. Misionet publike nuk mbyllen në një proces të vetëm dhe nuk përcaktohen nga një moment teknik, por nga karakteri, qëndrueshmëria dhe besimi i ndërtuar në kohë”, shton Hysaj.

Ajo përfundon mesazhin me një premtim: rruga e saj vazhdon me qetësi dhe vendosmëri, në shërbim të interesit publik, pavarësisht zhurmës dhe polemikave politike.