Kanadaja dhe Shqipëria kanë nënshkruar një marrëveshje historike për transportin ajror, e cila për herë të parë do të mundësojë fluturime direkte midis dy vendeve, duke shënuar një hap të rëndësishëm në forcimin e marrëdhënieve dypalëshe.

Lajmin e bëri të ditur Ministri i Transportit i Kanadasë dhe Udhëheqës i Qeverisë në Dhomën e Komunave, Steven MacKinnon, i cili vlerësoi rëndësinë strategjike të marrëveshjes për të dy shtetet.

“Jemi të kënaqur që finalizuam këtë marrëveshje të re për transportin ajror me Republikën e Shqipërisë, një nga ekonomitë me rritjen më të shpejtë në Evropë. Duke mundësuar për herë të parë fluturime direkte midis dy vendeve tona, kjo marrëveshje krijon mundësi të reja për linjat ajrore, forcon lidhjet mes njerëzve dhe rrit më tej lidhjen globale të Kanadasë”, u shpreh MacKinnon.

Sipas marrëveshjes, disa kompani ajrore do të kenë mundësinë të operojnë fluturime të rregullta mes Kanadasë dhe Shqipërisë, me deri në 14 fluturime pasagjerësh në javë dhe 10 fluturime mallrash në javë për secilin vend. Gjithashtu, linjat ajrore do të kenë akses në çdo aeroport brenda territorit të dy shteteve.

Përveç lehtësimit të udhëtimeve, fluturimet direkte pritet të kenë ndikim të drejtpërdrejtë edhe në bashkëpunimin ekonomik. Bizneset shqiptare do të kenë qasje më të gjerë në tregun kanadez, ndërsa kompanitë kanadeze do të përfitojnë nga mundësi të reja investimi dhe bashkëpunimi në Evropën Juglindore.

Edhe Ministri i Tregtisë Ndërkombëtare të Kanadasë, Maninder Sidhu, theksoi rëndësinë e kësaj marrëveshjeje për marrëdhëniet Kanada–Shqipëri.

“Marrëveshja për Transportin Ajror shënon një moment kyç në forcimin e marrëdhënieve tona dypalëshe. Ajo do të rrisë lidhjen ajrore, do të krijojë mundësi të reja për turizmin dhe do të forcojë lidhjet mes njerëzve, duke mbështetur objektivat e Kanadasë për diversifikimin e tregtisë”, deklaroi Sidhu.

Sipas tij, kjo marrëveshje do të ndihmojë bizneset kanadeze të kenë qasje në një treg në rritje në Evropën Juglindore, si dhe do të mbështesë eksportuesit për të arritur klientë të rinj ndërkombëtarë, duke reflektuar angazhimin e Kanadasë për zgjerimin e tregtisë globale dhe partneriteteve me përfitime reciproke.