Detaje të reja janë zbardhur lidhur me operacionin e zhvilluar një ditë më parë në Itali, ku autoritetet çmontuan një grup të strukturuar italo-shqiptar të trafikut të lëndëve narkotike. Hetimet kanë treguar se organizata kriminale ishte shumë më e madhe dhe më e sofistikuar nga sa ishte parashikuar fillimisht.

Sipas burimeve hetimore, në krye të grupit qëndronin dy shtetas shqiptarë, të cilët jetonin mes zonave Castelfiorentino dhe Colle Val d’Elsa. Ata dyshohet se kishin rolin drejtues, duke ndërtuar strategjitë e trafikut, kanalet e furnizimit, vendet e ndalimit dhe magazinimit të drogës, si edhe duke përcaktuar çmimet e shitjes dhe rrjetin e klientëve.

Kontaktet e tyre më të besuara menaxhonin depot e narkotikëve, kujdeseshin për transferimin e lëndëve të paligjshme dhe përgatisnin dërgesat që do t’u dorëzoheshin blerësve. Po ashtu, ata ishin përgjegjës për mbledhjen dhe administrimin e të ardhurave të përfituara nga shitja e drogës.

Hetimi ka zbuluar se disa prej të dyshuarve ishin të punësuar zyrtarisht si shoferë furgonësh apo korrierë në kompani transporti rrugor mallrash për palë të treta. Këtë aktivitet ata e përdornin si mbulesë, duke simuluar shpërndarjen e produkteve të ligjshme, ndërsa në realitet transportonin drogën të fshehur në qese plastike të zakonshme, të destinuara për klientët e rrjetit kriminal.

Autoritetet italiane vijojnë hetimet për të dokumentuar të gjithë shtrirjen e aktivitetit kriminal, identifikimin e bashkëpunëtorëve të tjerë dhe sekuestrimin e pasurive të përfituara nga trafiku i lëndëve narkotike.