Detaje të reja janë zbardhur në lidhje me ngjarjen e rëndë të ndodhur në Mamurras, ku një person mbeti i plagosur pas të shtënave me armë zjarri.

Sipas raportimeve në media, i plagosuri është identifikuar si Pjetër Marku, i cili sapo ishte kthyer nga Anglia. Ai dyshohet se është përfshirë në një konflikt të çastit me autorin, i cili tashmë është identifikuar nga Policia.

Mësohet se konflikti ka nisur për motive të dobëta, pasi i plagosuri i ka kërkuar autorit të lëvizte me kujdes dhe të mos xhironte gomat e automjetit në zonë. Pas këtij momenti, situata ka agravuar, ndërsa autori dyshohet se ka nxjerrë armën e zjarrit dhe ka qëlluar dy herë me pistoletë.

Si pasojë, një prej plumbave ka kapur në krah Pjetër Markun, i cili është transportuar drejt spitalit për ndihmë mjekësore. Fatmirësisht, ai ndodhet jashtë rrezikut për jetën.

Policia ndodhet në kërkim të autorit dhe po vijon hetimet për zbardhjen e plotë të rrethanave të ngjarjes, si dhe për dokumentimin ligjor të saj.