Autoritetet amerikane po hetojnë vrasjen e profesorit të njohur të Massachusetts Institute of Technology (MIT), Nuno Gomes Loureiro, i cili u qëllua për vdekje në banesën e tij pranë Bostonit.

Viktima, 47 vjeç, ishte profesor i shkencës dhe inxhinierisë bërthamore dhe drejtor i Qendrës për Shkencën e Plazmës dhe Bashkimit Bërthamor në MIT. Sipas policisë, Loureiro u qëllua me armë zjarri mbrëmjen e së hënës brenda apartamentit të tij në Brookline dhe, pavarësisht ndihmës mjekësore, ndërroi jetë disa orë më vonë në spital.

Një fqinj ka njoftuar autoritetet pasi ka dëgjuar disa të shtëna, ndërsa dyshohet se autorët janë larguar menjëherë nga vendngjarja. Deri në këto momente nuk ka persona të arrestuar dhe policia ka nisur një hetim aktiv për vrasje, duke punuar për identifikimin e autorëve dhe zbardhjen e rrethanave të ngjarjes.

Nuno Gomes Loureiro ishte i martuar dhe baba i tre fëmijëve. Ai kishte një karrierë të shquar akademike, me formim universitar dhe pasuniversitar në Portugali dhe Mbretërinë e Bashkuar, përpara se t’i bashkohej stafit akademik të MIT në vitin 2016. Në vitin 2024, ai u emërua drejtues i Qendrës për Shkencën e Plazmës dhe Bashkimit Bërthamor.

Fusha kryesore e kërkimit të tij ishte energjia e bashkimit bërthamor, e konsideruar si një burim energjie i pastër dhe pothuajse i pakufizuar, me potencial të madh për të ndihmuar në luftën kundër ndryshimeve klimatike.

Vdekja e tij ka shkaktuar tronditje në komunitetin akademik dhe ka nxitur edhe spekulime për motivet e krimit. Megjithatë, autoritetet kanë theksuar se deri tani nuk ka asnjë indicie që ngjarja të lidhet me aktivitetin e tij shkencor, ndërsa hetimet vijojnë.