Harry Kane ka shprehur vlerësime shumë të mëdha për Lenny Karl, talentin 17-vjeçar që po kthehet gjithnjë e më shumë në një element kyç për balancat taktike të Bayern Munich. Në një intervistë për kanalet zyrtare të Bundesligës, sulmuesi anglez theksoi ndikimin e menjëhershëm që i riu ka pasur në lojën e skuadrës bavareze.

“Lenny ka qenë fantastik deri tani. Ai ka cilësi të jashtëzakonshme, sidomos në hapësira të ngushta, dhe kontributi i tij është shumë i rëndësishëm për ne”, u shpreh Kane, duke vënë në pah pjekurinë e parakohshme të talentit të ri.

Kapiteni i Anglisë shpjegoi se prania e Karl i ndihmon kampionët e Gjermanisë të zhbllokojnë ndeshje të vështira, veçanërisht kundër skuadrave që mbrohen thellë. “Shpesh përballemi me ekipe që luajnë me linja shumë të ulëta ose me skema si 5-4-1, duke e bërë të vështirë gjetjen e hapësirave. Lenny, falë shpejtësisë dhe aftësisë për të kaluar kundërshtarin, arrin t’i hapë këto hapësira”, tha Kane.

Ai e krahasoi ndikimin e Karl me atë të Jamal Musiala-s, një tjetër yll i Bayern-it: “Në këtë aspekt më kujton shumë Jamal Musiala, sepse aftësia e tij për të krijuar epërsi numerike na lejon të arrijmë më lehtë te goditja dhe të krijojmë raste”.

Kane nuk la pa përmendur as kontributin e të riut në fazën pa top, duke vlerësuar disiplinën dhe përkushtimin e tij. “Ai punon shumë për skuadrën. Me mënyrën tonë të stërvitjes dhe me një trajner kaq kërkues, nuk mund të ishte ndryshe. Është një djalë i qetë, gjë e natyrshme për një 17-vjeçar në një ambient të tillë, por mëson çdo ditë dhe po e shijon eksperiencën në grup”.

Sipas Kane, prania e Lenny Karl ka qenë vendimtare në disa momente të sezonit: “Ai ka bërë realisht diferencën në shumë ndeshje këtë sezon”, përfundoi sulmuesi anglez, duke konfirmuar se Bayern Munich ka në duar një tjetër talent me potencial të jashtëzakonshëm për të ardhmen.