Pas disa ditësh mbylljeje për shkak të një grevë të stafit, Muzeu i Luvrit në Paris u rihap plotësisht këtë të premte. Punonjësit votuan unanimisht për pezullimin e përkohshëm të grevës, duke mundësuar rikthimin e muzeut më të vizituar në botë në funksion normal dhe pritjen e vizitorëve.
Greva kishte çuar në mbylljen totale të muzeut në fillim të javës dhe në një rihapje të pjesshme të mërkurën. Sindikatat thanë se vendimi erdhi pas pesë takimeve me përfaqësues të Ministrisë së Kulturës, por paralajmëruan se përparimi mbetet i pamjaftueshëm, sidomos lidhur me mungesën e stafit, nivelin e pagave dhe planet afatgjata të sigurisë.
Punonjësit ngritën gjithashtu shqetësime për degradimin e ndërtesës dhe kushtet e punës. Ata kritikuan drejtuesen e Luvrit, Laurence des Cars, për mungesë angazhimi gjatë grevës, duke theksuar se ajo nuk u takua me stafin dhe nuk iu drejtua punonjësve gjatë protestës.
Një tjetër asamble e përgjithshme është planifikuar më 5 janar, ku punonjësit do të vendosin nëse do të rifillojnë apo jo grevën, duke lënë të hapur tensionet mbi të ardhmen e muzeut.
