TIRANË – Në natën e tretë të edicionit të 64-t të Festivalit të Këngës në RTSH, prezantuesit Salsano Rrapi dhe Arilena Ara njoftuan shpalljen e 23 artistëve finalistë që do të ngjiten në skenën e natës finale.

Publiku shqiptar dhe kosovar do të ketë mundësinë të votojë për këngëtarët e tij të preferuar përmes SMS-ve. Votimi nga Shqipëria mund të bëhet në numrin 56789, ku një mesazh kushton 60 lekë, ndërsa nga Kosova në numrin 55789 me çmim 1 euro. Çdo numër telefoni mund të dërgojë deri në pesë vota.

Fituesi i këtij edicioni do të vendoset nga një kombinim i votave të jurisë (50%) dhe votave të publikut (50%), duke fituar kështu të drejtën për të përfaqësuar Shqipërinë në Eurovision.

Tre netët e Festivalit kanë ofruar emocione të forta, performanca artistike dhe nostalgji për publikun, duke rikujtuar hitet më të famshme të interpretuara ndër vite në skenën e këtij kompeticioni të rëndësishëm muzikor.