HateAid, organizata gjermane që këshillon dhe lufton gjuhën e urrejtjes dhe nxitjen e urrejtjes në internet, është vënë në shënjestër të administratës së Presidentit të SHBA-së, Donald Trump. Departamenti Amerikan i Shtetit ka ndaluar hyrjen në Shtetet e Bashkuara për dy drejtorët ekzekutivë të organizatës, si dhe për tre shtetas të tjerë europianë, me arsyetimin se dyshohen për nxitje të censurës ndaj platformave amerikane online.

Lajmi u bë publik përmes një njoftimi zyrtar në platformën X, ndërsa drejtoreshat ekzekutive të HateAid, Josephine Ballon dhe Anna-Lena von Hodenberg, reaguan duke deklaruar se nuk ishin të befasuara nga vendimi. Sipas tyre, bëhet fjalë për një akt represioni politik.
“Është një akt represioni nga një qeveri që shpërfill gjithnjë e më shumë sundimin e ligjit dhe përpiqet t’i bëjë kritikët të heshtin me të gjitha mjetet”, thuhet në reagimin e tyre.

Sekretari amerikan i Shtetit, Marco Rubio, e justifikoi masën duke folur për atë që e cilësoi si presion ideologjik nga Europa. “Për një kohë shumë të gjatë, ideologët në Europë kanë udhëhequr përpjekje të organizuara për të detyruar platformat amerikane të ndëshkojnë pikëpamje amerikane që nuk u përshtaten atyre”, shkroi Rubio në X, duke paralajmëruar edhe ndalime të tjera udhëtimi.

Masat e ndërmarra prekin gjithashtu ish-Komisionerin europian Thierry Breton, i konsideruar si arkitekti i Aktit të Shërbimeve Dixhitale (Digital Services Act), ligj kyç i Bashkimit Europian për rregullimin e platformave online. Rubio e cilësoi këtë legjislacion si një “sulm ndaj platformave amerikane të teknologjisë dhe popullit amerikan nga qeveritë e huaja”.

Breton reagoi në X duke deklaruar: “Për miqtë tanë amerikanë: Censura nuk po ndodh aty ku mendoni se po ndodh.” Edhe qeveria franceze shprehu zemërim për vendimin e Uashingtonit.

Administrata amerikane njoftoi gjithashtu sanksione ndaj Clare Melford, themeluese e Indeksit Global të Dezinformimit (GDI) me bazë në Britani, si dhe ndaj Imran Ahmed, themelues i Qendrës për Kundërshtimin e Urrejtjes Dixhitale (CCDH), organizatë që vepron në SHBA dhe Mbretërinë e Bashkuar. Ahmed, i cili jeton në Uashington, rrezikon tani dëbimin nga SHBA-ja. Më herët, pronari i platformës X, Elon Musk, e kishte cilësuar CCDH-në si një “organizatë kriminale”.

Vendimi i Uashingtonit pritet të thellojë më tej tensionet mes SHBA-së dhe Bashkimit Europian për çështjet e rregullimit të hapësirës dixhitale dhe lirisë së shprehjes në internet.