Aktori dhe komediani i njohur britanik, Russell Brand, po përballet me dy akuza të reja për përdhunim dhe sulm seksual, duke u shtuar ndaj akuzave të mëparshme që përfshijnë përdhunim, sulm të pahijshëm dhe dhunë fizike ndaj katër grave të ndryshme. Komediani 50-vjeçar u paraqit në gjykatë në maj, duke u deklaruar i pafajshëm për akuzat ekzistuese.

Policia Metropolitane konfirmoi se akuzat e reja lidhen me dy gra të tjera. Shefi i detektivëve, Tariq Farooqui, tha: “Gratë që kanë dalë hapur, përfshirë ato të lidhura me dy akuzat e reja, vazhdojnë të marrin mbështetje nga oficerë të trajnuar posaçërisht.” Hetimi policor është ende në zhvillim dhe autoritetet bëjnë thirrje për dëshmi nga kushdo që mund të ketë informacion. Brand pritet të paraqitet në gjykatë muajin e ardhshëm për dy akuzat e reja.

Hetimi filloi në shtator 2023 pas ankesave të shumta dhe raportimeve nga Dispatches i Channel 4 dhe The Sunday Times. Incidentet e para, që lidhen me katër gra të tjera, dyshohet të jenë kryer midis viteve 1999 dhe 2005.

Sipas akuzave, Brand dyshohet se përdhunoi një grua në një hotel në vitin 1999 pas një takimi në një aktivitet teatri në Bournemouth, si dhe një grua që punonte në televizion në Soho në vitin 2004, ku e detyroi për një akt seksual pas prekjes së trupit të saj. Një tjetër grua pretendon se është sulmuar në një stacion televiziv në vitin 2001.

Gjyqi për akuzat fillestare është planifikuar të nisë më 16 qershor, ndërsa hetimi mbi akuzat e reja vazhdon.