Një aksident rrugor është regjistruar ditën e djeshme në segmentin Vrion–Krane, në kthesën e Finiqit, ku një automjet ka dalë nga rruga dhe është përmbysur në kolektorin buzë aksit rrugor.

Sipas informacioneve paraprake, në mjet ndodhej vetëm drejtuesi, një 65-vjeçar me inicialet SH.XH. Menjëherë pas njoftimit, në vendngjarje kanë mbërritur forcat zjarrfikëse të Bashkisë Finiq dhe shërbimet e Policisë, të cilat kanë bërë të mundur nxjerrjen e drejtuesit nga automjeti i përmbysur.

I dëmtuari është transportuar me urgjencë drejt spitalit të Sarandës për ndihmë mjekësore, ndërsa burime spitalore bëjnë me dije se ai ka pësuar dëmtime që nuk paraqesin rrezik për jetën.

Ndërkohë, policia ka nisur hetimet për zbardhjen e shkaqeve të aksidentit, ndërsa pritet të kryhet edhe testi i alkoolit ndaj drejtuesit të mjetit.