Sekretari i Përgjithshëm i Partisë Demokratike, Flamur Noka, ka komentuar zhvillimet e fundit politike dhe situatën brenda opozitës, duke u ndalur veçanërisht te pozicioni i Ervin Salianjit në PD.

I ftuar në emisionin “Studio24” në News24, Noka deklaroi se Salianji nuk është më anëtar i Kryesisë dhe as i ndonjë strukture tjetër të Partisë Demokratike. Sipas tij, kjo ka ardhur si pasojë e vetëpërjashtimit të Salianjit, pas takimeve që, sipas Nokës, ai ka zhvilluar me persona të lidhur me botën e krimit për organizimin e aktivitetit politik në Elbasan.

“Që kur u ul me Ergys Agasin, Suel Çelën dhe Ben Qimen për të organizuar aktivitetin e Elbasanit, ai kaloi vijën e kuqe të kësaj partie dhe nuk ka më lidhje me PD-në. Është vetëpërjashtuar”, u shpreh Noka.

Ai theksoi se Partia Demokratike ka një vijë të qartë dhe të panegociueshme në raport me krimin e organizuar, e sanksionuar edhe në statut. “Marrëveshjet me krimin e organizuar dhe mafian janë vijë e kuqe për PD-në. Kush e kalon atë vijë, vetëpërjashtohet. Kjo është një histori e mbyllur”, deklaroi Noka.

Deklaratat e Sekretarit të Përgjithshëm pritet të rikthejnë debatet brenda opozitës, në një moment të ndjeshëm për Partinë Demokratike dhe skenën politike në vend.