Sekretari i Përgjithshëm i Partisë Demokratike, Flamur Noka, komentoi zhvillimet e fundit politike dhe aktivitetin e opozitës, duke u ndalur te një skandal i mundshëm përgjimi që lidhet me Ergys Agasin.

Sipas Nokës, ndaj Agasit janë përdorur pajisje për përgjim, të cilat shërbenin për të monitoruar ambasadorë, institucione të drejtësisë dhe aktorë të politikës. “Unë kam qenë ministër i Brendshëm, nuk ka shans që SHISH të mos nuhasë përdorimin e një pajisjeje të tillë, sepse ata i kanë të gjitha mjetet për ta gjetur këtë,” tha Noka, duke shtuar se situata ngre pyetje serioze për funksionimin e shërbimeve të inteligjencës.

Ai nënvizoi rëndësinë e informimit të institucioneve përgjegjëse, duke theksuar se çdo mosveprim cenon sigurinë kombëtare. “Nëse SHISH nuk ka njoftuar institucionet përgjegjëse, lindin shumë pikëpyetje, sidomos për cenimin e sigurisë kombëtare, qoftë individualisht apo në grup. Kjo është shumë e rëndë dhe nuk duhet neglizhuar,” u shpreh Noka.

Sekretari i PD-së theksoi gjithashtu se ka informacion të detajuar për skandalin, por detajet mbeten të klasifikuara si sekret hetimor. “Hetimet vazhdojnë, nuk mund të flas më shumë. Por shumë gjëra do të dalin në pah më vonë dhe do të qelbet dynjaja,” përfundoi ai.